Berbera (Somaliland.org) – Shixnad lacag Shilin Somaliland cusub ah oo uu soo daabacday hoggaamiyaha xisbiga talada haya, Daahir Riyaale ayaa maanta dalka soo gaadhey.

Shixnaddaa lacagta ah oo ay siddey Diyaarad khaas ahi waxay maanta duhurkii ka soo degtey Gegida Diyaaradaha ee magaalada Berbera, waxaana lagu qiyaasay shixnaddaas ilaa 40 Ton, balse, lama garanayo tirada lacagtaa cusubi inta ay tahay.

Sida ay sheegayaan wararku diyaaradda siddey Shixnadda lacagta ah waxa laga leeyahay dalka Koonfur Afrika, balse, waxay ka soo duushay Malta, halkaas oo loo malaynayo in lagu soo daabacay lacagtan cusub. Waxaana isla galabta loo soo raray lacagtaas dhinaca magaalada Hargeysa, iyada oo lagu ilaaliyey dhawr gaadhi oo tikniko ah.

Wax war ah oo ramsi ah lagama bixin lacagtaas caddadkeeda iyo ujeeddada loo soo daabacay midna.

Hase yeeshee, inkasta oo warar ku dhowdhow masuuliyiinta baanku ay tibaaxeen in lacagtaas loogu talagalay in lacagta Giimbaarta loo yaqaanno ee Shilin Soomaaliga ah lagaga beddelo Burco, haddana waxa caado ah in Daahir Riyaale markasta oo doorasho soo dhowaato uu soo daabacdo lacag shilin Somaliland ah oo cusub, taas oo uu ku isticmaalo doorashooyinka.

Dhinaca kale, lacagtana ayaa noqonaysa mid sharci darro ah maadaama aanu Golaha Wakiilladu ansixin, iyada oo uu Dastuurku waajibinayo in golaha Wakiilladu ansixiyo lacagta la soo daabacayo, si uu u ogaado lacagta la soo daabacayo tiradeeda iyo baahida keentay. Hase yeeshee, ma jirto mar keliya oo lacag la soo daabacayo uu ansixiyey Golaha Wakiilladu