Hargeysa (Somaliland.Org)- Guddida Doorashooyinka Somaliland, ayaa ka hadlay Kaadhadhka cusub ee la sheegay inay dhawaan u samayn doonaan in lagu galo Doorashada la filayo inay dalka ka dhacdo.

Afhayeenka Guddida Doorashada Somaliland Axmed Maxamed Xirsi (Geelle) oo maanta Shir-jaraa’id ku qabtay Hargeysa, ayaa sheegay in muddo laba toddobaad ah ay ku mashquulsanaayeen dhismaha Guddiyada gobollada ee Komishanka Doorashooyinka, isla markaana ay hadda dhammeeyeen dhismahooda. “IInkasta oo ay soo baxeen khaladaadyo yar-yar oo aan badnayn, haddana guddiyada aanu dhisnay waanu isla qaadanay Axsaabta Siyaasadda oo waanu isku waafaqnay.” Ayuu yidhi Afhayeenka Guddida Doorashooyinku.

Afhayeenku wuxuu sheegay in Kaadhadhka cusub ee ay samaynayaan ay iyagu xaq u leeyihiin samayntooda, isla markaana ay kala tashadeen Axsaabta iyo Wasaaradda arrimaha gudaha Somaliland. waxaanu xusay in Kaadhadhkaas la siin doono dadka ku soo baxa Liiska saxda ah ee kala-shaandhaynta dadkii isdiiwaangeliyey. “Waxaanu Kaadhadhkan u samaynaynaa si loo helo Doorasho xor iyo xalaal ah waxa daruuri noqotay in la helo Kaadhadh cusub, waxaana samaynta Kaadhadhka u tartamay Shirkado kala duwan oo ay ku jiraan kuwo Somaliland laga leeyahay, hase ahaatee waxa ku guulaystay Shirkad Ajaanib ah.” ayuu yidhi Afhayeenku.

Mar la waydiiyay Afhayeenka Magaca Shirkadda ku guulaysatay samaynta Kaadhadhka iyo dalka laga leeyahay, ayaa wuxuu ku jawaabay oo uu yidhi, “Shirkadda waxa la yidhaahdaa Face Technology, waxaana laga leeyahay dalka Koonfur Afrika.”

Sidoo kale, mar uu ka jawaabayay waqtiga ay qaadan doonto kaadh-samayntu, wuxuu sheegay inay qaadan doonto muddo bil ah, isla markaana aanay dib u dhigi doonin Doorashada.

Somaliland.Org

Hargeisa News Desk

Hargeysa (Jam)-Guddoomiye-ku-xigeenka 1aad ee golaha wakiillada Somaliland Md. Cabdicasiis Maxamed Samaale, ayaa sheegay in guddoomiyaha baarlamaanka Ingiriisku u caddeeyey in dib-u-dhacyada joogtada ah ee ku yimi doorashooyinku dhaawac weyn u gaysteen sumcaddii Somaliland, isla markaana hadday sidaa ku sii socdaan ay dhib weyn soo gaadhi doonto dalka.

Md. Cabdicasiis Maxamed Samaale oo shalay xafiiskiisa magalada Hargeysa waraysi khaas ah ku siiyey Jamhuuriya, waxa uu faahfaahin ka bixiyey natiijada shir ay isugu yimaaddeen baarlamaanada dalalka ku jira ururka Barwaaqo-sooranka oo uu dhowaan kaga qaybgalay magaalada London, kaasoo uu sheegay in guddoomiyaha baarlamaanka Ingiriisku qayb libaax ka qaatay in shirkaas caalamiga ah oo ay ka qaybgaleen 44 dawladood lagu casuumo Somaliland.

Guddoomiye-ku-xigeenka 1aad ee wakiillada oo ugu horreyn sharraxaad ka bixinayey shirka ay ka qaybgaleen iyo waxyaabihii lagaga wadahadlay waxa uu yidhi; “Shirkaa waxa lagaga hadlayey sida mashaakilaadka loo xaliyo iyo waxyaabaha keena mashaakilaadka. Waxa kale oo uu nuxurkiisu ahaa sidee loo adkayn karaa nabadgelyada Afrika iyo ta adduunka? Waxaannu ahaa shir aad iyo aad u qiimo badan.

Shirkaas 31 January 2010 – 7 February 2010 ayuu ka kala socday labada magaalo ee London iyo Belfast oo ah caasimadda Woqooyiga Ireland, waxana ka soo qaybgalay madax aad u tiro badan, kuwaasoo uu ugu horreeyey guddoomiyaha Baarlamaanka Ingiriiska oo run ahaantii xidhiidh dhow leeyihiin Baarlamaanka Somaliland. Afhayeenkan oo ahaa sababta iyo furaha casuumaddan Somaliland loo fidiyeyna wuxuu horeba xoog ula socday arrinta Somaliland iyo ictiraaf-raadinteedaba, intii murannada iyo doorashooyinka dib-u-dhacay ee Somaliland ay jireenna xidhiidh toos ah ayuu la soo sameeyey Baarlamaanka Somaliland, isagaoo mar walba rajaynayey in doorashooyinku ay ku dhacaan si nabadgelyo ah, xalkii u dambeeyey ee arrintaas laga gaadheyna aad buu noogu soo hambalyeeyey, waxaannu ku soo dardaaranay inay doorashooyinku si dhakhso ah u qabsoomaan.

Guddoomiyaha baarlamaanka waddanka Ingiriiska oo ah nin Somaliland aad u jecel, waxaannu ku kaftanay markii shirka la furay Somaliland inay aqoonsi iyo waxtar uga baahan tahay, isaguna runtii wuxuu sheegay in martiqaadkan la innagu martiqaaday shirkan waddamada Barwaaqo-sooranka (Commonwealths) ay tahay wanaagga Somaliland loo hayo, sidoo kalena tahay qayb ka mid ah ictiraafka Somaliland.

Guddoomiyaha baarlamaanka Ingiriisku wuxuu uu arkayey doorashadda saddexda jeer dib u dhacday, welina aanay mudaysanayn inay tahay arrin dhaawac ku ah hor-u-socodka Somaliland, waxanu u arkayey hadday Somaliland sidaa ku socoto inay dhib weyn la kulmeyso, waxaanay innagula talinayeen in Somaliland midnimadeeda loo midoobo, annaguna waannu u mahadcelinay.”

Waxa Md. Samaale waraysigiisa ku xusay in xidhiidh wanaagsan dhexmaray weftiga Somaliland ee shirka ka qaybgalay iyo wufuuddii wadamadii kale, isaga oo sheegay in masuuliyiintii shirkaas ka qaybgalay ay aad ugu faraxasanaayeen inay arkaan wefti ka socda Golaha Wakiillada oo shirka ku sugan, taas oo uu ku tilmaamay inay qiimo weyn ugu fadhiday Somaliland, waxaanu caddeeyey in marka laga hadlayo dhibaatooyinka ka jira Somaliya iyo budhcad-badeedda ka dillaacday xeebaha Somaliya laga reebayey Somaliland oo loo arkayey meel xasiloon.

Guddoomiye-ku-xigeenka 1aad ee wakiilladu waxa uu xusay in nabadgalyadu ku xidhan tahay horumarka iyo shaqaalaynta dhallinyarada, isaga oo sheegay in haddii taas la waayo aanay wax nabadgalyo la yidhaa jirayn. Guddoomiyaha oo arrintaas ka hadlayeyna waxa uu yidhi; “Waxaad arkaysaa inaanay nabadgelyo jirayn haddaanu dalku horumar lahayn, nabadgelyo in aanay jiray haddii uu dal dhallinyarada iyo dadka ku nooli ay bilaa shaqo yihiin, dalka ay ku badan tahay xatooyada iyo musuqmaasuqa in aanay nabadgelyo jiray, hadday nabadgelyo ka jirtana tahay mid aan ku taagnayn cago adag oo ay waqti kasta dumi karto, waxana tusaale loogu soo qaadanayey waddamo badan oo Afrika ah oo dhibaatooyin iyo burbur ka jiraan. Waxyaabaha burburiyeyna dhammaantood waxay xidhiidh la lahaayeen arrimaha horumarinta, musuqmaasuqa iyo kuwo la xidhiidha hantida ummaddi leedahay oo dadka talada hayaa ay siday rabaan u isticmaalaan oo ay ummaddu ku kacdo, dabadeedna maamulkii iyo ummaddii iska horyimaaddaan oo dalkii ay dawladdiiba sidaa ku baaba’aan.

Waxa la ogaaday siday saxaafadda madaxabannaani qayb uga tahay nabadgelyada, hadday dal ka jirto cadaadis iyo cidhiidhi lagu hayo saxaafadda madaxabannaan oo waxa ka shaqaynayaa tahay saxaafad ay maamusho dawladdu oo laga qaadayo ammaanta iyo waxqabadka been-abuurka ah ee madaxda dalka xukunta iyo wixii kalee runta ka sheegi lahaana la cabudhinayo in nabadgelyada waddankaa ka jirtaa tahay mid taban.”

Guddoomiye-ku-xigeenka oo ka hadlayey waxyaabaha iyo faa’iidooyinka Somaliland uga soo kordhay shirka baarlamaanka waddamada Barwaaqosooraka waxa uu yidhi; “Waxaan odhan karaa Somaliland wax weyn ayaa shirkaa uga soo kordhay, wufuuddu waxay ku farxayeen siday Somaliland uga soo kabatay dhibaatooyinkii soo maray, Somaliland-na waxa loo soo qaadanayey tusaale fiican, iyadoo waddamada jaarka sida Soomaaliya ay dhibaatooyin dagaal oo ba’ani halakeeyeen, welina ay ka jiraan afduub ba’an oo loo geysanayo maraakiibta badda Cadmeed maraya, arrintanina waxay dhibaato weyn ku haysaa caalamka.

Somaliland waxay noqotay mid arrintan ka badbaaday, isla markaana tahay waddan wax ka qaban kara, annaguna dhankayaga waxaannu u sheegnay inay u baahan tahay in la ictiraafo, Somaliland-na xallin karto dhibta Soomaaliya marka la ictiraafo.”

“Shirkaa waxyaabaha ugu muhiimsan ee Baarlamaannada taabanaayey waxa ka mid ahaa sida loo tilmaamayey qiimaha ay Baarlamaannada la soo doortay u leeyihiin waddamadooda, inuu yahay Baarlamaanku xubin ay soo doorteen shacabku, taas oo metelaysa shacbiga, sidii Baarlamaannadu ugu adeegi lahaayeen dadweynaha, waanna cidda dajinaysa siyaasadda dalka lagu hagayo, hadday tahay mid dhaqaale, dibadeed iyo siyaasad kastaba.”

Md. Samaale oo ka jawaabayey su’aal la weydiiyey oo ahayd aqoonta ay ka soo faa’iideen shirka ay ka qaybgaleen iyo sida ay ugu dabaqi doonaan hawlaha ay qaranka u hayaan, waxa uu yidhi; “Somaliland waxan u malaynayaa in aannu ku dhisi doono Baarlamaanka iyo dalka gudihiisa oo aannu dadkayagana ugu faa’iideyn doono annaga oo Illaahay la kaashan doona, aniga oo runtii rumaysan qiimaha aqoontu leedahay iyo sida aqoonta loogu horumari karo, waxna loogu qaban karo shacabka iyo dalkaba, taas oo aannu ka soo qaadanay 44 dal baarlamaannadoodii iyo afhayeennadoodii, waxaanan rajaynayaa inay noqon doono mid annaga iyo dalkaba na anfici doona.”

Guddoomiye-ku-xigeenka 1aad oo su’aal laga weydiiyey in arrimaha shirkaas lagaga hadlayey qaarkood si toos ah u khuseeyaan Somaliland, waxa uu yidhi; “Waxyaabaha shirka lagaga hadlayey, mararka qaarkood baan is odhanayey malaha dalkaagiibaa weynayso lagu eegayaa oo wixii dalkaaga ka jiraybaa meesha lagaga hadlaya, waxyaabaha shirkan lagaga hadlayey ee nabadgalyadda xumeeya waxay ahayd wax Somaliland-na ka jira, adduunka inteeda kalena ka jira, waddamo badanna weynu ka wanaagsan nahay.

Waxa kaloo lagaga hadlayey sida waxyaabahaa loo daweynayo, Somaliland lafteedu hadda tahay waxyaabahaa aynu ka hadlayno sida madmadow iyo musuqmaasuq, shaqo la’aan iyo saxaafad la cabudhinayo sidii loo daweyn laha oo looga gudbi lahaa, waxana laga hadlayey waxyaabahaas hadday sii fidaan oo la joojin waayo inay waxyeellayso jiritaanka nabadgelyada hadday sii xooggaysataan, waxaanuna u aragnaa in haddii dhaliilo la sheegayo aanay ahayn in qof la caayayo, balse macnaheedu waxa weeye xannuun ayaa jiraa una baahan in laga hortago.”

Isagoo ka jawaabayey su’aal la xidhiidhay aragtidiisa ku waajahan khilaafka dhinaca sharciga ah ee u dhexeeya wasiirka xannaanada xoolaha iyo guddida dhaqaalaha Golaha Wakiillada waxa uu yidhi; “Waxannu u aragnaa inay tahay shaqadda guddigu inay u yeedhaan Wasiirka Xannaanada Xoolaha iyo cidday u baahdaan, waanna arrin waafaqsan dastuurka. Waxananu u aragnaa inay tahay arrin khaldan inay diidaan horimaatinka guddiga, maaha inay xukuumadda ka dhago- adaygto xisaabinta, waayo taasi waxay caddaynaysaa inay jiraan waxyaabo xukuumaddu qarinayso oo ay daboolayso, lana dhuumanayso, waxaanay ceeb ku tahay xukuumadda.”

Md. Samaale oo ka hadlayey khasaaraha Somaliland ka soo gaadhi doona haddii doorashadu qabsoomi weydo, waxa uu yidhi; “Cidkastoo Somaliland xil u haysaa oo ay arrintan doorashadu khusayso waa inay si daacadnimo u gudato weeyaan. Sharaftii dalku hoos bay u dhacday markii doorashadu saddex jeer dib-u-dhacday, iminkana indho-gaar ah ayaa la innagu eegayo iyada oo laga shakisan yahay inay Somaliland dhab ka tahay in doorashaddu qabsoonto, waayo shakiga waxa sii xoojinaya markaad mar iyo laba iyo saddex jeer been sheegto ee wixii aad ballanqaaday fulin weydo, marka dambe waxa imaynaysa maxaa lagugu rumaystaa? Waxaanan rajaynayaa inay markan ka duwanaato oo doorashadu si xor iyo xalaal ah innoogu dhacdo doorasho. Kolley qofna kursiga ku raagi maayee waxay Soomaalidu ku maahmaahdaa; ‘Waari mayside war ha kaa hadho!’ Qofkii kursiga isku sii dhajiyaa wuxuu ka qaadaa magac-xumo iyo sharaf-darro. Waxa hubaal ah nabadgelyada Somaliland waxa burburin karaa iyadoo doorashada dib loo dhigo,” ayuu yidhi Md. Samaale.
Jamhuuriya Online

Dubbe iyo Doolaal  duqay weeye magaalo oo dalkooda ilaasha.  Waa laba aan kala daalin dariiqna aan wada qaadin. Midba duubka wanaagga dushaasuu ku sitaa iyagaaba is doortay.Waa laba aan debec yeelan oon hadal diirkaba saarin deelqaafna wuu ka dhacaa. Haddana inay is dilaan iyo dudmana loogama yaabo. Waa niman aan dan ka yeelan dadka kay ku arkaan waxay diidan yihiin ee duunkoodu la yaabo derejo uu doono ha yeeshee, kay daafacayaanna  inta daaqsinta geela looga soo durki maayo. Ruuxay diiraddoodu haleesho daguugahay ka dhigaan dembina loo qabsanmaayo oo duqoodi Dhanxiirbaa digreetadaa u saxeexay ducana waabu u raacshay. Bartay doodda jilba iyo foodda ay is daraanna waa Danlaawoow mafrishkooda oo ay qadadii dabadeeda iyo duhurka ay ku kulmaan.

Dubbe:Farsamooyinka Somaliland maalin walba anigoo is leh wax aad garan weydaa kuuguma hadhin ayuumbaan wax cusub oo aan garan waayo arkayaa.

Doolaal:Oo maxaad aragtay iminkana?

Dubbe:waxaan arkay Habar Yoonis shiraysa oo aan ku shirayn Oodweyne ama Burco ama cadaadlay ama Laan Mullaaxo ama Gaashaamo oo inta ay guntiga gaabsadaan singalaydna la soo hadhaan  aan geel ku qalanayn  ee intay muraayado madmadow xidheen gawaadhi madmadawna gaxaysteen buuraha madmadaw ka gudbay oo badwaynta madaw tegey oo kalluun madaw dalbaday. Markaasaa arrinkoodi iga madoobaaday.

Doolaal:Waayo muxuu kaaga madoobaanayaa sawkuwa baaqa wanaagsan soo saaray ee yidhi dekedda maydh ha la dhiso. Miyaanu kaasi baaq wax ku oola ahayn?

Dubbe:Mayee wuu yahaye waxaanse garan waayay Maydh markaad maqasho macnaheedu waa Sheekh Isaxaaq markaa waxaan is weydiiyay haddii dekedda maydh la dhisayo maxaa reer sheikh isaxaaq uga shiri waayay ama reer Somaliland oo dhammi? Waxa kale oo aan is weydiiyay, aniga oo aan Salaadiinta niyad jebinayn oo weliba ay ixtraam iga mudan yihiin, tolow dekeddu hay dambaysee dugsigii Caddaadlay may jiingad iga saaraan? Mise arrinku waa marka deked la helo ayaa dugsi la helaa? Anigu weli shirkaa ma garan.

Doolaal:maxaad kale la yaabtay iska dhaaf salaadiinta oo.

Dubbe:waxa kale oo aan la yaabay Guurtidii ina tidhi waanu heshiinnay oo intii UDUBta ahayd uun sidii ay doonayeen wax u qaybsadeen oo xitaa ay  garan waayeen inay niyad wanaag muujiyaan oo mansabyada u qaybsadaan dhinacyadii is hayay. Wallee Guurtida Somaliland ayaan caddaalad laga helin. Yeelkadoodee hambalyo. Wixii ay yidhaahdaan wanu ku heshiinay ayaynu ku raacaynaa.

Doolaal:Maanakaa idin yaraynay. Waar maxaad kale aragtay?

Dubbe:waxa kale oo aan la yaabay, waxa la yidhi Djibouti ayaa inagu casuuntay dalkeena.waxa la yidhi. “ninka guriigiisa ama xoolihiisa kaa martisoora nin dheh. Ninka guri kale ama xoolo nin kale kaa martisoorana nimanyaal dheh.” Waar baasaboorkii yaraa bal halkuu inala marayo eega. Calaa kullun xaal hambalyo Ugaaska la caleemo saaray. Beesha Ciisena hambalyo xeerka ay ku dhaqmaan. Anaga xeer,distoor,shareeco  midna naloogu taagwaaye.

Doolaal:Ugaasku waa hambalyo eh maxaad kale haysaa?

Dubbe:Waxaan hayaa waxa halkan inala fadhiya maanta nin dhallinyaro ah oo fariida oo magaciisa la yidhaahdo Dubeeco.saw adigu Doolaal maad ahayn anna Dubbe? Isna waa Dubeeco. Dhawr jeer baan hadalka ku gooyay isagoo is leh hadal. Raali aha woo inoo wad adeer.

Dubeeco:Wax kale maan lahayne waxaan arkay Xildhibaan yidhi waxa laygu garaacay oo laygu afxumeeyay kaantaroolka bariga  Boorame oo “haddaan sheego waxii laygu yidhi qarankaa dumaya.” Waxaan idhi. “sidii bahalkii biriishka ka dhacay Ilaahay ballankii barquu kacay.” Waa midhihii (AHN) Cabdi Malow. Tolow Cabdi Malow cid ma ka tegey?

Dubbe:Haaye. Nin wanaagsan oo miskiin ah oo maalin dhoweydna Kulmiye been ka sheegayay oo lahaa waxay yidhaahdeen Ku-xigeenkii wuu dhintay ayuu dhalay.

Dubeeco:Oo adeer ma qaadkaa kugu yar kululaaday? Waa maxay waa nin miskiin ah oo wanaagsan iyo haddana been intaa leeg buu sheegay?

Dubbe:Adeer labaduba waa wax jira oo aan kala reebi kari waayay eh. Adigu iska dhaafoo sidii Cabdi malaw ma aha uun ka soo qaad. Inoo wad sheekada xildhibaanka yaan ku illawsiine. Oo xildhibaanku waa kuma?

Doolaal:Waar inanka ha dembaajin ee iska daa.

Dubeeco:Waxba ma laha eh. Xildhibaanku waa Xasan Cawaale Caynaan.

Dubbe: Haa. Beriguu macalinka ahaa nin dadka aad wax u baray oo wanaagsan buuahaaye. Abaalkaa Somaliland way u haysaa laakiin siyaasaddii buu ku yar asqaoobaye.

Dubeeco:Ninkii xildhibaanka ahaa oo aan ku aqaanay kuwa xumaanta ku taageera Ina Rayaale ee weliba ku dagaalama ayaan markaan hadalkiisi maqlay waxaan xusuustay  marxuumkii Cabdikariim Xaaji Ducaale oo beri wefti la socday ay meel tuule ah istaageen si ay hilib uga cunaan. Intaan hilibkii loo  keenin baa war ku soo dhacay oo la yidhi Xabashi baa idinku soo socota. Wadaday cabbeen. In doora markay socdeen ayay joogsadeen oo yidhaadeen “waynu lunnay”  wuxuu yidhi. “iminka maynu lumine saaka markaa hilibkii inaga soo kaxayseen baynu lunnay.” Haddaba waxaan leeyahay maanta markii lagu garaacay qaranku muu dumine wuxuu dumay:

• Markaa Ina Rayaale ka oggolaatay ee aad ku raacday inuu ku amro inay askartu suuqa Hargeysa muwaadiniinta ku toogtaan oon laba cali isweydiin.
• Markaad ka oggolaaday in askariga yar ee Wajaale haystaa uu Faysal Cali Waraabe gacantiisa ula tago oo uu weliba baastoolad ula baxo oo uu ku sii dallaco.
• Makaad ka oggolaatay inuu isla askarigaa yare e Dacawo la yidhaadaa ku garaacay Wajaale Umulaha ee uu xabsiga Gabiley u taxaabay iyagoon dambi geysa. Markuu graacay Curyaanka laxaadka la’ ee calanka Kulmiye huwaday. Markuu laba muwaadin oo gaadhi iskaga dhex jira toogtay ee ay ku naf waayeen. Markuu Guddomiyaha Degmada wajaale dhirbaaxada kaga saraay shir saxaafadeed uu qabtay. Markuu gaadiidka muwaadinuuntu leedahay isku deyey inuu Xabashi u gacan geliyo. Markuu xabsiga dhigay qofkii uu doono am il qalloocan ku eegaba ee uu weliba ku sii dallacay adna aad ku taageertay.
• Markaad oggolaatay  inuu Boolisku Wakiilada mucaaridka ah dhirbaaxo kaga saaro golahahooda aad ka midka tahay ee weliba ay quful ku jebiyeen.
• Markaad oggolaalay inuu Muj. Yusuf Cabdi Gaboobe jeelka mandheera sharci darro ugu xidho waayo Haatuf buu ku qoray musuqa Madaxtooyada hadheeyay.
• Markaad oggolaatay inuu sharci darro ku xidho Gaboose,Maxamed Xashi iyo Jamaal caydiid oo keliya codasay in xisbiyada la furo.
• Markaad ka oggolaatay inuu Abshir, darwalkii hore ee xaaskiisa jeelka mandheera u diro waayo dhaartii uu dalka u maray ayuu ku dhaqmay oo wuxuu sheegay musuqa hantida umadda lau lunsado wixii uu ka ogaa.
• Markaad oggolaadtay ee aad sacabka u tuntay inay saxaafadda gawda ka saaraan oo qalabka si Ilaahay uun ogyahay ay ku soo heleen ka jejebiyeen ee haddana cidi juuq u odhan weyday.
• Markaad sacabka u tuntay markuu Boorame ka dhigtay boqortooyo uu leeyahay.
• Markaad sacabka u tuntay markuu xisaab xidhkii misaaniyadda keeni waayay.
• Markaad sacabka u tuntay markuu kalluunka dalka keligii dhoofsaday.
• Markaad ka oggolaatay uguna sacabbo tuntay inuu xeer wal oo buugaagta ku yaalla jebiyo.
• Markaad ka oggolaatay inuu hantifda umadda ku tagri fallo si sharci darro ah.
• Markaa macasha u qabtay markuu xaraashayay guryaha umadda.
• Markaad ka oggolaatay inuu xisaabta dekedda iyo ta Total keligii ku tagri falo.
• Markaad ugu dagaalantay inuu xoolaha laba nin oo keliya u xidho.
• Markaa ku garab gashay inuu muwaadiinta shaqada ay helaan ka hor joogsado sidii Aamina Weris.
• Markaad ku taageertay inuu baabiiyo ururada xuquuqda Aadamaha.
• Markaad ka oggolaatay  inuu ku taageero markay wasiiradiisu hablaha caarka ah aflagaadeeyaan. Mise tolow markaa xildhibaan maad ahayn.
• Markaad u sacabisay inuu salaadiinta iyo madax dhaqameedyada jeelasha ku guro sharci darro.
• Markaad ka oggolaatay inuu lacag iska soo daabacdo isagoon golaha aad ka midka tahay ee Wakiilada soo marin sida Distoorku dhigayo.
• Markaad ka oggolaatay in Dalka saddex lacagyaow oo laba ajaanib tahay gobolada dalka laga isticmaalo.
• Markaad ka oggolaatay inuu ciidaamada qalabka sida derejo siin waayo(adna cid aad la hadasho ayaa heli lahayd haddaad sarkaalka iyo askariga kala garanayso markay ku caayayeen)
• Markaad ka oggolaatay in uu adeegsado Guddiyada nabadgelyada ee Golaha aad ka midka tahay ka soo saaray qaraar odhanaya “waa sharci darro aan Distoorka waafaqsanayn.”
• Markaad ka oggolaatay inuu warbaahinta umadda keligii adeegsado oo weliba cay iyo isku dir beelaha ah ka fidiyo.
• Markaad ka oggolaatay inuu Golayaasha Deegaanka ka hor joogsado inay shirar aan caadi ahayn qabsadaan.
• Markaad ugu sacabo tuntay inuu xisbiyada qaanka ee kiisa la midka ah u diido inay meel ay lacagtooda ku kiraysteen ku shiraan.
• Markaad ugu rixlaysay inuu Guddoomiyahaaga baastoolad loola soo baxo.
• Markaad indho li’i dhego li’i ugu raacday intaa iyo inkaloo ka badan ayuu qaranku dumay saaxiib.

Ta kale haddii aad iminka uun toostay askartu maalin walba shicibka dil iyo dagaal iyo xadhigba iyo aflagaadaba  way ku  hayaan hadday joogaan kantaroolka Boorame,ka Buurta kal jeexan, ka Hallaye ka Caanteynada Berbera ka Burco iyo mid walba.

Doolaal:’aar kan yar baaba u daran ee xagguu nooga keenay. Adeer iska qayil.

Waa inoo qoraalka xiga. Haddii Eebe idmo.

1. Geeljire

Hargeysa (kulmiye.Org)- Guddoomiyaha Xisbiga Mucaaradka ah ee KULMIYE Axmed Maxamed Maxamuud (Siilaanyo), ayaa Xukuumadda ugu baaqay inay qorshe ka yeelato khasaarooyin kala duwan oo ay keeneen Roobab ka da’ay deegaano Somaliland ka tirsan.

Guddoomiyaha ayaa Warsaxaafadeed uu maanta ka soo saaray magaalada Hargeysa waxa uu kaga hadlay khasaare ay keeneen Roobab ka da’ay deegaano ka tirsan deegaannada Somaliland qaarkood.

Warsaxaafadeedkaasi wuxuu u dhignaa sidan;

“Sidaynu wada ognahay waxaa bilowday raxmaadkii roobka gu ga, ilaahayna aynu ugu shugri naqayno, maadaama uu inaga soo jabiyey abaartii baahsanayd ee guud ahaan ka jirtay Somaliland.

Roobabkaasi oo khasaare gaadhsiiyey magaalooyinka Berbera iyo Wajaale, waxaanay waxyeeleeyeen goobo kala duwan oo ku yaala Magaalooyinkaas.

Haddaba, Xisbiga KULMIYE waxaanu ka tacsiyadaynaynaa khasaaraha naf iyo maalba leh ee soo gaadhay  magaalooyinka Wajaale iyo Berbera. Sidaa darteed, Xisbiga Kulmiye waxa uu ugu baaqayaa Xukuumadda Somaliland, Dawlaha Hoose iyo dhamaan Hay’adaha Caalamiga ah inay u gurmadaan sidii wax looga qaban lahaa khasaaraha soo gaadhay magaalooyinkaas.

Xisbiga KULMIYE wuxuu u soo jeedinayaa, kuna talinayaa Xukuumada Somaliland inay qorshe habboon ka yeelato waxyeelooyinka sida caadiga ah roobabku soo gaadhsiiyaan Magaalooyinka Somaliland, sida daadadka galay Bakhaaradda Wajaale iyo Maxjarka Xoolaha ee Berbera.

Ugu danbayntii, Waxaanu kula talinaynaa Xukuumadda Somaliland in la Sameeyo qorshe lagaga faa’iidaynayo  biyaha roobabka ee sanad walba iyagoo qulqulaya badda toos u taga, dadweynahana waxaanu ku boorinaynaa inay xoogga saaraan sidii ay u kordhin lahaayeen wax-soosaarkooda dalaga beeraha, iyagooka faa’iidaysanaya roobabka. Bulshow aynu isku tashano, nimaan dhididini ma dhargee.”

Somaliland.Org

Hargeisa News Desk

Siday sheegayaan Wararka naga soo gaadhay magaalada Tog-Wajaale ee xuduudka Somaliland iyo Itoobiya, roob xooggan oo shalay abbaaro 5:00 galabnimo ka bilaabmay magaaladaas, isla markaana qaaday ilaa 6:30 fiidnimo ee xalay, ayaa keenay khasaare kala duwan. Daadadkan ayaa galay guud ahaan dhismayaasha iyo Meheradaha ka ag-dhaw Togga wayn ee kala qaybiyay Wajaale, ka dib markii uu Toggaasi fatahay. Waxaanu galay Xafiisyada laanta Socdaalka ee Degmadaas, halkaas oo ay ku qoyeen sida la sheegay qaar ka mid ah Qalabkii Xafiisku. “Xafiisyadii oo dhan wuu galay Daadku, waxaanay Biyuhu qofka u gaadhayeen Jilbaha, halkaasna waxa ku qoyay Buugaagtii iyo qalabkii kale ee Xafiiska.” Sidaa waxa yidhi mid ka mid ah goob-joogayaashii goobta ku sugnaa marka ay Biyuhu galeen Xafiiska.

Dhinaca kale, Daadadkan oo galay qaar ka mid ah Guryaha ka ag-dhaw Togga, ayaa sidoo kale qaaday oo galay qaar ka mid ah Bakhaarrada magaaladaas. Halkaas oo uu geystay khasaare, isla markaana qooyay Raashinkii dhex yaalay qaarkood. “Hadda Caruurihii Guryihii way dhex taag-taagan yihiin oo Daadadkii way qaadeen wixii dadka u dhex yaalay Guryaha.” Sidaa waxa yidhi mid ka mid ah dadka ku dhaqan Wajaale.

Geesta kale, inta la ogyahay ilaa shan Baabuur ayay qaadeen Daadadka xalay ku soo rogmaday Degmada Tog-Wajaale, kuwaas oo badankoodu yaalay Xafiiska Kastamka ama Laanta socdaalka agtiisa, halka kuwo kalena lagu xidhay Xadhko adag, si aanu Daadku ula tagin. “Gaadhi aan leeyahay oo Grande ah ayuu qaaday Daadku, inkasta oo aanan la joogin marka uu Daadku qaaday Gaadhigayga, haddana markii dambe ee aan gaadhay Togga waxaan arkay isaga oo dhex yaala meel Togga dhexdiisa ah.” Sidaa waxa isna yidhi Maxamed Cabdilaahi Qonbor oo ka mid ah dadka Gaadiidkooda uu qaaday Daadku oo Khadka Telefoonka ugu waramay Wargeyska Ogaal xalay. “Laba Xaajiyadood oo kuwii Istaanka yaalay ahaa ayuu qaaday Daadku, labada Nin ee kala lahaana waxa magacyadooda la kala yidhaahdaa Ibraahmi Aadan iyo Maxamed Ahmed Xaaji. Meel togga dhexdiisa ah ayay yaalaan, balse cidi uma dhawaan karto oo Daadku wuu socdaa oo si xooggan ayuu u socdaa (xalay). Laba gaadhi oo kale ayaa iyana xidhan midna Grande yahay midka kalena Surf, si aanu u qaadin Daadku.” Waxa isna sidaa Ogaal xalay Khadka Telefoonka ugu sheegay Maxamuud Aleel oo ka mid ah dadka ku dhaqan Degmada Wajaale.

Sidoo kale, Wararka ka imanaya Degmadaasi waxay sheegayaan in ilaa 5,000 oo neef oo Adhi ahi ku naf-waayeen Deegaannada Gobolka Gabiley oo ilaa shalay Roobku ka da’ayay.

Somaliland.Org

Hargeysa, February 28, 2010 (Haatuf) – Roobab aad loogu diirsaday oo biyo dhig wayna keenay ayaa labadii maalmood ee u danbeeyey si wayn uga  da’ay gobolada dalka Somaliland, iyo guud ahaanba deeganada miyiga

Iyadoo magaalooyinka waawayn ee ay ka mid tahay caasimada dalka ee Hargeysa roobabkii ku bilaabmay habeenkii sabtida todobaadkan ay roobabkii bilawday subaxii ay ku gabal dhacsadeen iyagoo raxamadaa Alle ku maansheeyey ay ka siman tahay dalka, iyagoo magaalooyinka qaarkood mudo 4 saacadood oo xidhiidh ah ay uga dayeen, balse ayna ka dhalanin ilaa hada inta la ogyahay wax khasaare ama dhibaato ah oo ay gaysteen.

Deegaanada ay roobabku ka kala da’een oo la sheegay shalay subaxdii si ay ku bilaabmeen in ilaa xalay ay ka da’een ayaa waxa ka mid ahaa Gobolkada Maroodi Jeex iyo deegaamada hoos yimaada caasimada dalka ee Hargeysa, Gobolka Awdal gaar ahaan caasimadiisa Boorama iyo guud ahaanba deegaamada hoos yimaada ee ay ka mid yihiin Baki, Xariirad, Lughaya, Boon oo naloo sheegay in ilaa xalay uu roobku hayey deegaamadaasi, dhinaca kale Gobolka Salal oo xaruntiisu tahay dagmada Saylac ayaa isagana naloo sheegay in roob balaadhani ka da’ay shalay galab.

Magaalo madaxda Gobolka Togdheer ee Burco ayaa wararka aanu ka helayno waxa ay noo sheegeen in magaalada Burco roobkii ku bilaabmay shalay Casarkii uu ilaa xalay ka da’yey.

Magaalada Madaxda Gobolka Saaxil ee Berbera ayaa iyadana wararka aanu ka helnay ay noo sheegeen in roob aad u balaadhani ka da’ay mudo 4 saacadood ahna uu si xidhiidh ah uga da’yey.

Roobabkan maasheeyey Gobolada dalka oo labadii maalmood ee ugu danbeeyey si xidhiidha uga da’yey Somaliland ayaa waxay soo afjareen abaarihii iyo biyo la’aantii mudooyinkii u danbeeyey ka taagnaa qaar ka mid ah Gobolada dalka ee Somaliland, kuwaas oo ay saamayn ku yeesheen xoolaha iyo dhul daaqsimeedkii deegaanada miyiga.

Xigasho/ Haatufnews

Hargeysa (Jam)- Guddoomiyaha xisbiga mucaaridka ah ee KULMIYE Md. Axmed Maxamed Maxamuud (Siilaanyo), ayaa shalay khadka telefoonka kula sheekaystay Madaxweyne-ku-xigeenka Somaliland Md. Axmed Yuusuf Yaasiin oo xaalad caafimaad u jooga dalka Faransiiska.

Sida lagu sheegay warsaxaafadeed shalay ka soo baxay xarunta dhexe ee KULMIYE oo uu ku saxeexan yahay xoghayaha guud ee xisbigaas Md. Keyse Xasan Cige, waxa Madaxweyne-ku-xigeenku u sheegay in xaaladdiisa caafimaad u fiican yahay, isagoo Guddoomiye Siilaanyo-na Ilaahay uga baryey caafimaad degdeg ah.

Warsaxaafadeedkaas oo faahfaahsanna waxa uu u qornaa sidan:

“Guddoomiyaha xisbiga KULMIYE Md. Axmed Maxamed Siilaanyo, waxa uu maanta [shalay] telefoon kula hadlay Madaxweyne-ku-xigeenka JSL Mudane Axmed Yuusuf Yaasiin oo hadda socdaal caafimaad ku jooga dalka Faransiiska, wuxuuna ka warraystay xaaladdiisa caafimaad.

Madaxweyne-ku-xigeenka JSL Mudane Axmed Yuusuf Yaasiin waxa uu uga warramay Mudane Axmed Siilaanyo xaaladdiisa caafimaad, wuxuuna u xaqiijiyey inuu aad iyo aad u wanaagsan yahay.

Guddoomiyaha xisbiga KULMIYE Mudane Axmed Maxamed Siilaanyo, wuxuu isaga oo ku hadlaya magaciisa, kan xubnaha iyo taageerayaasha xisbigaba u gudbiyey Madaxweyne-ku-xigeenka salaan, waxaannu Ilaahay uga baryey inuu caafimaad sareecanna siiyo.

Mudane Axmed Siilaanyo waxa uu u rajeeyey Madaxweyne-ku-xigeenka Mudane Axmed Yuusuf Yaasiin inuu ku soo laabto dalkiisa hooyo isaga oo caafimaad qaba, si uu u sii wato hawshii uu qaranka u hayey,” ayuu warsaxaafadeedkiisa ku yidhi Xoghayaha Guud ee KULMIYE.

Xigasho/ Jamhuuriya Online

One would not be surprised at his position, but it is unfortunate that his ignorance – lack of education – and his hatred of the people of Somaliland can be easily deduced,

after almost half a century.

MP. Abdirazak was the man whose lack of vision and foresight – both which can attained through education, but which he lucked – were a set back and obstacle to his government.

During his visit to Hargeisa as Prime Minister, the people turned then back while he was addressing them at a very large rally. It was a sign of protest by the people to the head of the government. His answer was ‘YOU LOOK BETTER

WITH YOUR BACK TURNED.”

This answer should not have been given by a Prime Minister, but it is an indicator of his lack of intellect. Those who know him were not surprised for they know that he was not fit to be a Prime Minister.

In his executive interview; he criticized the late president of Somaliland Mohamed Ibrahim Egal. Historians and those who lived in the 60’s will not be surprised for Egal was the man, who politically isolated him, After forcing him to leave SYL Party – which he was one of the founders. He began a one-man party called DABKA. His interview against Somaliland’s recognition shows that his hatred towards Somaliland has not diminished even after half century.

Reasons he gave for opposing recognition are sufficient evidence of his anti-Somaliland attitude, although he is old and experienced.

He said; “The world is moving towards unity. Is Africa part of he world? if so, let us look of the movements going on in different parts of the continent.” What happened to the mergers of states that decided to break their unity? Has not he heard about Egypt-Syria or Senegal and Gambia among others?

The honorable PM spoke about Europe’s unity. He is right that they are moving towards one; but has he forgotten about the Soviet Union or Yugoslavia? Is he blinded by his hatred for the late president and Somaliland? Or his statement was based on ethnic opposition?

He spoke that the world can not swallow 5 Somali states. He is right, but has he lost the power of perception. Did he forget that Somaliland is and was a sovereign state before the merger? Has he forgotten that Puntland (Eastern Region of Somalia) has been a region in the Italian Colony of Somalia and that it is a regional administration and part of Somalia even today? Are the states of Somalia – Not Greater Somalia – part of his hallucination in his hatred for Somaliland and what it stands for?

He threatened Ethiopia, Kenya and Africa states that their recognition of Somaliland will bring about their disintegration as a state? What happened to Ethiopia when it recognized Eritrea? The answer is nothing.

I don’t know whether you will live long enough to see the Day Somaliland will be recognized, but remember you never dreamed that Italian Somalia will be independent, the day you swallowed the paper. That was heroic although your fear of being arrested by the Italians was the cause for that? You were a politician when the majority of African countries became independent? You were hiving abroad when the Soviet Union crumpled. But it looks as if you are not learning anything

From what has been going on in the world, during your life as a politician. Other might wonder why, but I we are not, for we know your feeble mind and the incurable wound inflicted on you. A wound that will never heal.

Hargeysa (kulmiye.Org)- Guddida Doorashooyinka Somaliland iyo hoggaanka Xisbiga  KULMIYE ayaa kulan ay ku yeesheen Khamiistii Xarunta Guddida Doorashada waxay kaga wada hadleen arrimo la xidhiidha geeddi-socodka Doorashada iyo diyaar-garowgeeda.

Warsaxaafadeed uu soo saaray Xoghayaha guud ee KULMIYE Keyse Xasan Cige oo arrintan la xidhiidha, ayaa lagu sheegay in hoggaanka sare ee KULMIYE iyo Guddida Doorashadu ay ka wada hadleen gaar ahaan Kaadhadh ama Aqoonsi cusub oo la sheegay in dalka loo keenayo, si loogu galo Doorashada.

Warsaxaafadeedkaasi wuxuu u dhignaa sidan;

“Waxa maalintii khamiistii ee bishu ahayd 25 February, 2010 kulan ku yeeshay xarunta Komishanka Doorashooyinka Qaranka xubno ka tirsan Hoggaanka Xisbiga KULMIYE iyo Guddiga Doorashooyinka Qaranka.

Guddiga Doorashooyinka iyo Madaxda Xisbigu waxay ka wada hadleen halka uu marayo barnaamijka iyo hawlgalka arrimaha la xidhiidha doorashadda Madaxtooyadda. Guddiga Doorashooyinka Qaranku waxay faahfaahin ka bixiyeen xaaladda u diyaar garawga doorashada guud ahaan, waxaana ay tilmaameen inay qorshaha ugu jirto in dib u eegis lagu sameeyo kaadhadhkii diwaan-gelinta ee hore loo bixiyey, iyadoo lagu talo jiro in muwaadin kasta la siiyo kaadh cusub oo hor leh oo loogu bedelayo kii uu hore u qaatay, kadib marka uu soo saaro Server-ku Liiska kamadambaysta ah, taasoo ay Guddiga Doorashooyinku ku tilmaameen in lagu xakamaynayo Dadkii ku noqnoqday diwaangelinta.

Guddiga Doorashooyinku waxaa kale oo ay u sheegeen Madaxda Xisbiga KULMIYE inay sidoo kale ula socodsiiyeen qorshahani Madaxda kale ee labada Xisbi Qaran ee UDUB iyo UCID.

Guddiga Doorashooyinka Qaranku waxa kale oo ay tilmaameen in qorshahan ku saabsan bedelka kaadhadhka diwaangelinta ay u soo bandhigi doonaan Xisbiyada Qaranka isagoo tafatiran oo faahfaahsan.

Ugu danbayntii, Madaxda Xisbiga KULMIYE waxay garawsadeen sharaxaadda ay Guddiga Doorashooyinku ka bixiyeen qorshaha ay ugu talogaleen doorashadda.”

Guddoomiyaha Awdal Oo Sheegay Inay Gaf Tahay Hadii Ay Jirto In Xildhibaan Xasan Cawaale Kaantaroolka Boorama Loogu Gaystay Xad Gudub

“Waanu Waafaqsanahay In Baadhis Lagu Sameeyo Cidii Falkaasi Ku Kacday, Waxay Ahayd Inuu  Xildhibaanku Nagu Soo Noqdo”

Maxamuud C/Laahi Cige

Hargeysa, February, 26, 2010 (Haatuf) – Gudoomiyaha gobolka Awdal Maxamud C/laahi Cige ayaa sheegay hadii xildhibaan Xasan Cawaale Caynaan ay ciidanka kaantaroolka magaalada Boorama laga galo ay kula kaceen xadhig, cago juglayn, iyo baadhasho ay tahay arin gaf ah oo fool xun, isagoo dhinaca kalena sheegay in saraakiisha boolisku ay u sheegeen inayna xaqiijin karin in xildhibaanku magaalada Boorama yimid.

Guddoomiyaha gobolka Awdal waxa kale oo uu sheegay inuu waafaqsan yahay in baadhis lagu sameeyo falkaasi uu sheegay in lagula kacay.

Guddoomiyaha Awdal Maxamud C/laahi oo wargeyska Haatuf xalay khadka telefoonka wax kaga waydiiyey falkaasi xildhibaan Xasan Cawaale uu sheegay in askarta kantaroolka Boorama kula kacay ayaa isagoo arinkaa ka hadlaya waxa uu yidhi “Arinka xilhibaan Xasan Cawaale joornaalka ayuun baan ku arkay markii aan saraakiisha ciidanka waydiiyeyna waxay igu yidhaahdeen arinkaasi waxba kama jiraan, waxaanay ii sheegeen in imaatinkiisa magaalada ay ka shakisan yihiin hase yeeshee hadii arintaasi dhacday waa arin gaf ah oo fool xun oo aan wanaagsanayeyn”

Mar aanu waydiinay badhasaabka Awdal Maxamud C/laahi sida uu u arko dalabka uu xildhibaanku ku soo jeediyey in gudi baadhis ah loo saaro falka lagula kacay waxa uu yidhi “in arinkaasi baadhis lagu sameeyo oo uu sheego ragii baadhay naguna soo noqdo waa arin aan waafaqsanahay, hase yeeshee xildhibaanku waxa ay ahayd intaanu arinkaasi faafin inuu masuuliyiintayada gobolka la soo socodsiiyo naguna soo noqdo”

S: Wuxuu sheegay xildhibaan Xasan Cawaale Caynaan in askarta kaantaroolku ay u ogalaan wayday inuu ku noqdo magaalada Boorama,mudo 20 daqiiqo ka dibna xayiraadii ay ka qaadeen ?

J: Horta xildhibaanadu karaamo iyo sharaf ayey naga mudan yihiin mana jeclin in gaf iyo meel ka dhac lagu sameeyo, hadii ay jirto in cago juglayn xadhig iyo baadhasho lagula kacay waa inuu isagu nagu soo noqdo imika oo uu cadeeyo cida ay ahaayeen ee falkaasi kula kacday.

Dhinaca kale taliyaha saldhiga magaalada Boorama Muuse C/laahi oo isagana aanu khadka telefoonka kula xidhiidhnay xalay isagoo jooga Boorama oo wax kaga waydiinay arinkaasi xildhibaan Xasan Cawaale ayaa isaguna noo sheegay inaanay waxba ka jirin dhacdadaasi, isagoo intaasi ku daray inay soo dhawaynayaan in gudi baadha loo saaro falkaasi xildhibaanku sheegay in loogu gaystay kaantaroolka Boorama doraad, isagoo taliyuhu arinkaasi ka hadlayana waxa uu yidhi “falkaasi uu sheegay xildhibaan Xasan Cawaale anagu ma hayno waxaananu qabnaa in gudi baadhitaan ku samaysa loo saaro in falkaasi dhacay, markii aanu askarta kaantaroolka waydiinay in falkaasi dhacay waxay noo sheegeen inaanu jirin, balse waxa kaliya ee ay noo sheegeen in nin gaadhi aanu lahayn watay ay ku waydiiyeen goobtaasi liisankii gaadhiga kana waayeen”.

Dhinaca kale xildhibaan Xasan Cawaale Caynaan oo isagu ka mid ah xildhibaanada firfircoon ee wakiilada kaga jira xisbiga UDUB lagana soo doortay gobolka Hargeysa gaar ahaana dagmada Gabiley ayaa isagu doraad sheegay in ciidanka kaantaroolka bari ee laga galo magaalada Boorama ay u gaysteen xad gudub iskugu jiray xadhig, baadhasho iyo aflagaado uu ka gaabsaday inuu iftiimiyo, tilmaamayna in gudi baadhis ah loo saaro xad gudubkaasi lagula kacay talaabada lagula kacay xildhibaankan ee uu ka dhawaajiyey ayaa la sheegay inay xiisad kulul ka dhex abuurtay dadwaynaha ku dhaqan magaalada Boorama iyo guud ahaanba shacbiga ku dhaqan caasimada Hargeysa, oo iyagu si wayn wax iskaga waydiinayey sababta keentay in falkaasi lagula kaco xildhibaankaasi oo ka mid ah wakiilada muxaafidka ee sida wayn u taageera hab dhaqanka hogaaminta xukuumada madaxweyne Daahir Rayaale Kaahin.

Waxa kale oo ay su’aalo iska waydiinayaan shacbigu aflagaadooyinka uu sheegay in qaranimada ay wax u dhimayaan ee uu ka gaabsaday inuu faahfaahin ka bixiyo waxay ahaayeen.